Pregón Ntra. Sra. de la Consolación 2007

Dicen en esti pueblu, como en otros munchos, que “de bien nacíos ye ser agradecíos” y yo quiero selo darreu con vos. Asina que agradezo de veres y de corazón el ofrecimientu de la Comisión de les fiestas pa oficiar de pregoneru. Ya se que ser pregoneru nel pueblu de ún ye como ser profeta ena so tierra y esto non ye cosa fácil, y menos entovía con 24 hores de antelación y recién aterrizau.

Por ciertu, nobleza obliga y de nobleza sabemos munchu en Caravia. Non ye per casualidá que un decretu real medieval diéramos reconocimientu de hidalguía universal a toos los naturales desti pueblu. Pero güey, más importante que la nobleza de casta o de fueru ye la nobleza d’alma y ésta hay que exercitala y trasmitila a les nueves xeneraciones dende les coses más pequeñes y diaries (el respetu al mediu natural o al patrimoniu públicu, per exemplu) hasta los compromisos más arriesgaos y de futuru.

Asegúrovos que el que vos fala ta muy orgullosu d’ haber naciu en’esti pueblín, de haber teniu una infancia feliz en él y de contar con unes raices tan vieyes de casi 3000 años, que se diz pronto. Comprobaréis que toy falándovos a la manera que deprendí les primeres pallabres fai casi 60 años y reconozo que soy un analfabetu ena mio llingua materna, a pesar de ser Académicu de la mesma. Hoy, afortunadamente, los nuestros rapacinos apréndenla en’es escueles y eso ye bueno, pero lo más importante ye que les madres y los padres la faléis en casa y los guajes xueguen en asturianu. Porque el asturianu de los nuestros güelos, ye parte de la nuestra identidad y de la nuestra riqueza cultural. ¡ Non lu abandonéis nunca !
¡ Non fagáis casu de tantu listu acomplexau !

En un pregón, amás de animar a la folixa festiva y cantar les excelencias propies del llugar, tamién hay que facer balance, contar experiencies y recuerdos y dar daqué conseju, eso si sin ponese pesau, cuando la xente ta esperando pa comer y beber y non i-apetez ponese demasiau seria. Asina que pidovos un pocu de pacencia y atención.

La memoria ye muy importante, porque alimenta el patrimoniu moral y cultural de les persones y los pueblos, faciéndomos responsables del nuestru futuru; y sería tráxicu e imperdonable que un pueblu milenariu como el nuestru, enfermase de alzheimer. Un pueblu sin memoria de so ye un pueblu sin cultura y sin identidá.

Per un ilustrau caravianu como Aurelio del Llano, a quien-i debemos un mereciu homenaxe institucional, sabemos que les nuestres raices milenaries tan ahí arriba nel monte, nel Picu Castru, antes de traspantales equí abaxu, a esti valle. Tamién sabemos que la naturaleza, esi capital que cuidamos pocu, fue siempre sagrada, como lo fue esi monte totémicu, llamau Sueve y coronau pol Picu Pienzu, o el caballu asturcón, tan bien representau pe’ los habitantes del Castru y que mos comunica con la meyor tradición céltica europea. Dalgunes recomendaciones: el nombre de Aurelio del Llano tien que tar en alguna institución cultural local, el so Llibru de Caravia tien que reeditase y promocionase y la fíbula del caballu del Castru tien que rexistrase y xestionase como marca identitaria y promocional de Caravia.

Si la memoria cultural y coletiva ye importante, la conservación del mediu natural que heredamos yelo muncho más. De él vivimos munches xeneraciones, no siempre respetándolu y tratándolu adecuadamente. Diomos alimentu y cierta riqueza mineral y agora conviértese en una atración turística y urbanística. Pero ojo, en una sola xeneración tamos perdiendo biodiversidad, osea patrimoniu natural universal, a pasos de xigante. Unos exemplos:¿ quién come hoy patates de riñón ? ¿ Quién planta o inxerta manzana mingana ? ¿ Quién conoz les manzanes sanjuanines ? ¿onde tan los castañeos o les bellotes pa los gochos ? ¿ y aquella variedá enorme de fabes de toos los colores, tamaños y sabores ?... Tovía recuerdo de rapacín el trigu y la escanda y güey ya non hay sicasi maizales, claro ni aquelles esvilles…. En la güertona de la Teyera tenía mi güelu unes 10 ó 12 clases de cerecezes, cirueles, peres… toes distintes y a cual meyor………… ¿ Quién mantién esa tradición milenaria de inxertar ?.

Nos tamién facíamos “botellón” a la nuestra manera, cuando éramos rapazones. Pero el nuestru era ir a asaltar los piescos de Cionina, les sanjuanines de Pumerín o les peres de Fefa la de Generoso. Y tamién teniamos “bandes juveniles”…. que yos lo digan a los del “airón” y el “airín”. Por ciertu, vienenseme a la memoria la xente de les nuestres xeneraciones que la vida non yos permitió llegar a vieyos: Migueluis el de Trechoriu, César el de Asterio y el de Esteban, Herminio, Sergio, Caco, Jorge, Monchi el de José Ramón y el mi primu, Generosín, Nacho, Manolín, Tinín, Joaquín el de Tente y de Mª Serafina, Mari, Susana y Paco Núñez, el últimu. Espero non olvidame de naide.

Precisamente, el otru patrimonio caraviense ye el humanu, desde Alex que cuenta díes hasta Celia que ya superó la barrera de los 110 años. Vieyos de los que aprender y jóvenes con futuru. Cuanto yos tenemos que agradecer a los más mayores vivos: a Irene, Emilia, Enedina, David, María, Pachín, Maruja, Angel, Erundina, Generoso, Fefa, Tito, Ramón, Mari, Barbarina, Milín, Amelia, Concha, Máxima, Sara, Esther.. por citar algunos….y a tantos otros que mos esperen ya en algún llugar y que guardamos en la memoria. Pero, necesitamos sabia nueva que llene los barrios y les escueles de guajes. Qué animación la de la Barreda, Bandalisque, la Rotella …. y la calle el Cuetu en otros tiempos: bastaben una tángara, una birla, unos cacos o unes chapes… ¿ Acordaisvos de aquellos atapeceres xugando a cazar esperteyos a ramascazos pe la cai ? Supongo que hablo en chino para la generación de la play-station, la psp o el surf. De aquellos tiempos y de esos mayores aprendimos que se puede ser feliz con muy pocu y que hay y merez la pena luchar por una vida distinta y mellor, sin aterrecer aquella. Permitime que faga un homenaxe de recuerdu a les mios tribus familiares con raigañu caravianu: a esi montón y variedá de Llera y Fernández.

Pero, non hay que ponese nostálgicos, porque el futuru va a ser meyor pa toos, ya lo está siendo en realidá. Quien mos iba a dicir que aquella escuela centenaria de la Restauración en la que aprendimos a lleer, escribir, contar y aquello de que “Viriato era un pastor lusitano…” y a la que dibamos en madreñes, diba a vaciase de guajes y llenase de mayores. La escuela y los maestros, tan importantes pa toos. Yo quiero recordar al únicu que tuve: a Don Heliodoro…. Que era de los de la “letra con sangre entra”… pero, ¿ Quién domaba a aquel ganau de entonces ? O que aquel Teleclub en precario diba a ser hoy cibercentro y Casa de Cultura…O que dibamos a pasear cómodamente hasta Carrales…Hay que reconocer que el pueblu ta más guapu que nunca, a pesar de que se echa de menos aquel Palaciu emblemáticu de los de Argüelles o la espadaña de la iglesia. Pero, duelme ver basures tiraes pe’les cunetes, bancos rotos n’el parque, plantes arrancaes a lo tochu… Ya se que hay gamberros e incultura en toes partes, pero en’el mio pueblu duélenme más. Permitime que felicite y anime a les nuestres autoridaes municipales p’el buen trabayu que tan faciendo, demostrando que el compromisu de los más xóvenes ye un buen motor pa espoxigar. Pero, non vos dormáis en’os laureles que queda munchu per facer.

Per ciertu, esti pueblu supo superar con dignidad dramas históricos y familiares de guerra, posguerra y dictadura y hoy ye un exemplu de tolerancia y reconciliación. Po’lo menos, yo aprendí equí que non hay enemigos políticos, solamente adversarios con opiniones e intereses distintos, y que la unidá ye lo más importante pa construir, pa progresar y, sobre tou, pa desterrar la intolerancia y derrotar a los enemigos de la llibertá y del pluralismu. Cuando me pregunten pe’les razones y la fuerza pa luchar por estos valores, siempre digo lo mesmu: son les mios raices, ye la mio cuna caraviana. Non lo dudéis.

Ye verdá que esti pueblu menguó dentro, pero creció fuera. Fue un semilleru con families caravianes trasplantaes desde la Patagonia a la América del Norte, por toda Europa y por la mayor parte de les rexones españoles (hay caravianos en Madrid, Barcelona, Zaragoza, Bilbao, Teruel, Córdoba, Sevilla, etc.…)… sin olvidamos de los vecinos y familiares que tenemos en Xixón, Uvieu, Avilés, les Cuenques o los pueblos vecinos. Caravianos de nacimientu que, cuando volvemos, traemosvos caravianos de adoción. Son miles estos caravianos que hay que mantener enganchaos emocionalmente. Y la Consolación ye un buen banderín de enganche, si sabemos adatala a los nuevos tiempos de la globalización y de internet.

Pero, equí non solu esportamos recursos humanos pe’l mundu, tamién fuimos hospitalarios con xente venía de Portugal, de Marruecos, de Galicia, de Castilla, de León, de Aragón y hasta de Cuba y otros pueblos hermanos de América…De tantos sitios, que arraigaren y traxeron sabia nueva. Y , agora, los nuevos caravianos que facen chalés y adosaos o rehabiliten cases vielles, perque se enamoren del nuestru pueblu: ¡ Bienveníos tamién ! Pero, non vos conforméis con veraniar, daimos idees, iniciatives, sumaivos al nuestru futuru. Faigamos futuru para Caravia toos xuntos.

¡ Vecines y vecinos, caravianos toos ! otra Consolación, otru añu más, otra vez el ciclu de la tradición: la novena, la foguera trasformada en verbena, la procesión, el ramu, la gaita, la subasta, les verbenes, los xuegos infantiles, la gira, los bolos, los concursos y competiciones deportives, la espicha, el bingo, el mercadillo, los nuevos artesanos, la feria…. Eso ye la fiesta: rituales y tradiciones, folixa a esgaya pa reunir a les families y reforzar el espíritu de la tribu, faciéndola más grande y más rica.

Per ciertu, hay otres consolaciones pe’l mundu: la de Cartaya en Huelva, la de Utrera en Sevilla, la de Villanueva en Ciudad Real, la de Alcobendas en Madrid o de la Santanyí en Mallorca… per citar les que yo descubrí va pocu. A lo meyor, merez la pena hermanase con esos pueblos…

Pues eso, que non decaiga la fiesta, que non decaiga la tradición…. Que haiga relevu pa la Comisión y que Caravia y los caravianos y caravianes de tou el mundu vayan siempre a más y sigamos alcontrándomos equí, en casa, cada añu.

Acabo con y como María Balbín, la poetisa caraviana:

Yo non te olvidaré nunca,
Llugarín de mio Caravia,
Non puedo tenete lexos,
Fécite un ñeru en’el alma

¡ Felices Fiestes a toes y a toos ¡
¡ Puxa la Consolación !¡ Puxa Caravia ! ¡ Puxa Asturies !

Pregón a cargo de Francisco José Llera Ramo, caravianu fiu de Pachin y Maruja,

en la actualidad Catedrático de Ciencia Política de la Universidad del País Vasco, Director del Euskobarómetro y Presidente de la Asociación Española de Ciencia Política y de la Administración.

Gracias a Charo Llera Ramo por enviárnoslo.